Aktakuzë kundër Enver Hasanit

Enver Hasani me dy bashkëpunëtorë i kanë mundësuar Institutit për Studime Ndërkombëtare nga Tirana përfitim kundërligjor në shumën prej 70.426,90 euro

Prokuroria Speciale e Republikës së Kosovës ka ngritur sot aktakuzë kundër ish kryetarit të Gjykatës Kushtetuese, Enver Hasanit dhe dy bashkëpunëtorëve të tij. Aktakuza është ngritur në Gjykatën Themelore në Prishtinë për veprën penale “Mashtrimi në detyrë” dhe lidhet me kohën kur Hasani ka qenë rektor i Universitetit të Prishtinës.

Bashkë me Enver Hasanin të akuzuar janë edhe Hakif Veliu ish-shef i Zyrës së Prokurimit në Universitetin e Prishtinës dhe Albert Ragipi, drejtor i Institutit për Studime Ndërkombëtare nga Tirana.

Sipas aktakuzës, të pandehurit, me qëllim të përfitimit të kundërligjshëm të dobisë pasurore për Institutin për Studime Ndërkombëtare në Tiranë, kanë falsifikuar kontratën origjinale “Përkthimi i librave nga gjuha angleze në gjuhën shqipe, për nevojat e Universitetit të Prishtinës”.

Në këtë mënyrë, të pandehurit i kanë mundësuar Institutit për Studime Ndërkombëtare nga Tirana përfitim kundërligjor në shumën prej 70.426,90 euro, raporton Kalloxo.com.

“Të pandehurit në bashkëkryerje kanë kryer veprën penale: “Mashtrimi në detyrë”, nga neni 341 par. 3 lidhur me par. 1, lidhur me nenin 23 të Kodit Penal të Kosovës”, thuhet më tej në komunikatën e Prokurorisë Speciale.

Aktakuza është ngritur nga një prokurore vendëse e Prokurorisë Speciale të Republikës së Kosovës, e cila i ka propozuar gjykatës që të pandehurit të shpallen fajtorë për veprën e kryer penale dhe të dënohen sipas ligjit, si dhe ka kërkuar që Instituti për Studime Ndërkombëtare nga Tirana t’ia kompensojë Universitetit të Prishtinës dëmin në shumën prej 70.426,90 euro.