Aktakuzë për terrorizëm

Pesë qytetarë të Kosovës janë akuzuar nga Prokuroria Speciale për aktivitete terroriste. Ata akuzohen se kanë planifikuar vrasjen e dy shtetasve amerikanë

Prokuroria Speciale e Republikës së Kosovës ka ngritur një aktakuzë në Gjykatën Themelore të Prishtinës, kundër pesë të pandehurve që akuzohen për terrorizëm. Ky është grupi i parë, ndaj të cili është ngritë aktakuzë për pjesëmarrje në luftën e ISIS dhe për planifikim të sulmeve në Kosovë.

Sipas aktakuzës, të pandehurit dyshohen për përfshirje, organizimin dhe drejtimin e një grupi terrorist.

“Për pjesëmarrjen në grup terrorist; përgatitjen e veprave penale terroriste; prodhimin e paligjshëm të materialeve shpërthyese; posedimin e paligjshëm të armëve dhe të eksplozivëve, nxitjen e urrejtjes fetare dhe për sulm të rëndë në territorin e Kosovës, si edhe kryerjen e terrorizmit brenda territorit të Republikës Arabe të Sirisë (Siri)”, thuhet në aktakuzë.

Të pandehurit, siç thuhet në një komunikatë për media, janë arrestuar në Prishtinë duke u përpjekur të blejnë një numër të madh të armëve dhe municionit sulmues ushtarak.

Ata janë zbuluar nga Drejtoria e Policisë së Kosovës (PK) kundër Terrorizmit, në kohën kur po planifikonin sulm kundër dy misionarëve të krishterë nga Shtetet e Bashkuara.

“Në këtë hetim 14 mujor janë përfshirë analizat forenzike të dëshmive nga ana e Agjencisë së Forenzikës të Kosovës dhe të ndihmës juridike ndërkombëtare me shtetet anëtare të BE-së. Rasti është duke u ndjekur penalisht nga një prokuror ndërkombëtar i Prokurorisë Speciale të Republikës së Kosovës”, thuhet në komunikatë.