Akuzat e kryeministrit Cipras, të pahijshme

VMRO DPMNE reagoi ashpër ndaj kritikave që adresoi në drejtim të Shkupit, kryeministri i Greqisë, Aleksis Cipra në Beograd. Ai akuzoi Maqedoninë për irredentizëm

Partia më e madhe në Maqedoni, VMRO DPMNE reagoi ashpër ndaj kritikave që adresoi në drejtim të Shkupit, kryeministri i Greqisë, Aleksis Cipras, i cili në takim me kryeministrin e Serbisë, Aleksandar Vuçiq e akuzoi Maqedoninë për irredentizëm dhe nacionalizëm.

Nga VMRO thonë se sulmet dhe ofendimet më shumë flasin për atë që i thotë ato se për atë të cilit i janë drejtuar.

“Republika e Maqedonisë as nuk ka pasur dhe as nuk ka pretendime territoriale ndaj Greqisë. Republika e Maqedonisë dhe populli vetëm e kanë mbrojtur të drejtën e tyre të vetëpërcaktimit dhe identitetin e tyre. Republika e Maqedonisë nuk ka vendosur sanksione ndaj Greqisë. Përkundrazi, Greqia ishte pala e cila i mbylli kufijtë dhe e cila me veto e bllokoi vendimin për anëtarësimin e plotfuqishëm në NATO”, thuhet në reagimin e VMRo-së, citon alasatm.

Greqia, sipas kësaj të fundit, është pala e cila deri më sot nuk lejon rekomandimet pozitive për fillimin e negociatave për anëtarësim në Bashkimin Evropian.

“Me këto deklarata dhe ofendime që nuk mbajnë aspak ndaj Maqedonisë dhe popullit, kryeministri grek nuk kontribuon për zhvillimin e marrëdhënieve të mira fqinje dhe as nuk tregon të paktën pak vullnet në tejkalimin e problemit të cilin e ka Greqia me emrin tonë. Me këto deklarata Cipras tregon se ai nuk ka vullnet për zgjidhjen e kontestit, ndërsa jo Republika e Maqedonisë të cilën e akuzon”, vlerëson VMRO DPMNE.

Ndryshe, lidershipi në Beogard, presidenti Tomisllav Nikoliq dhe kryeministri Aleksander Vuçiq e falënderuan kryeministri grek që nuk e ka njohur pavarësinë e Kosovës.