Kurti të premten raporton para deputetëve për dialogun Kosovë-Serbi

Para nisjes për Bruksel, Kurti u drejtohet ligjvënësve

Kryeministri i Kosovës, Albin Kurti, do të raportojë në Kuvendin e Kosovës më 11 qershor lidhur me procesin e dialogut Kosovë-Serbi.

Këtë e ka bërë të ditur ushtruesja e detyrës së shefes së Grupit Parlamentar të Lëvizjes Vetëvendosje, Mimoza Kusari-Lila, pas mbledhjes së Kryesisë së Kuvendit.

“Me miratimin e Kryesisë, u vendos që raportimi i kryeministrit Albin Kurti të ndodhë si pikë e katërt e rendit të ditës në seancën e rregullt plenare më 11 qershor, ditën e premte. Gjithashtu, Kuvendi vazhdon punimet ditën e hënë me debatin parlamentar të kërkuar nga Grupi Parlamentar të PDK-së për gjendjen ekonomike dhe efektet e pandemisë në Kosovë”, ka thënë Kusari-Lila, përcjell Albinfo.ch.

Por, shefi i grupit parlamentar të PDK-së, Abelard Tahiri, tha se raportimi i Kurtit vjen pas shumë kërkesave të partive opozitare dhe kryeministri më në fund ka pranuar të raportojë në Kuvend.

“Kemi parë një lëvizje jashtëzakonisht të madhe të qëndrimeve të kryeministrit Albin Kurti”.

Tahiri ka shtuar se çështja e Asociacionit nuk duhet të jetë pikë e rendit të ditës në dialog, pasi që për të tashmë ka një vlerësim nga ana e Gjykatës Kushtetuese.

“Nëse vendoset Asociacioni si pikë e diskutimit në dialog, atëherë kërkohet të ndryshohet Kushtetuta, gjë që ne nuk do ta lejojmë një gjë e tillë të ndodhë”, ka thënë Tahiri.

Ai ka thënë se deri më tani nuk e kanë parë një përgatitje të Qeverisë sa i përket dialogut, por se ky debat do të jetë shumë i rëndësishëm.

“Ne e kemi parë një papërgatitje tash e tre muaj sa i përket çështjes së dialogut”, është shprehur ai.

 

---