Ambasada e ShBA-së: Sipas udhëzimit administrativ, qytetarët kanë të drejtë ta kërkojnë tërheqjen e kryetarëve

Ambasada e Shteteve të Bashkuara të Amerikës në Kosovë ka deklaruar se sa i përket procesit që lidhet me katër kryetarët e komunave në veri të Kosovës, qytetarët kanë të drejtë të bëjnë kërkesë për tërheqjen e kryetarëve të zgjedhur, bazuar në udhëzimin administrativ të nxjerrë nga qeveria.

Këtë e ka bërë të ditur zëdhënësja e ambasadës amerikane në Prishtinë, Katherine Judd, përcjell albinfo.ch.

“Qytetarët kanë të drejtë të bëjnë kërkesë për tërheqjen e zyrtarëve të zgjedhur sipas këtij udhëzimi administrativ. Ne respektojmë sundimin e ligjit në Kosovë, duke përfshirë ushtrimin e kësaj të drejte të veçantë, bazuar një proces demokratik dhe ligjor. Ne vazhdojmë të inkurajojnë Qeverinë e Kosovës që t’i sigurojë qytetarët që ata në mënyrë efektive të ushtrojnë të drejtat e tyre sipas udhëzimit administrativ”, ka thënë ajo në përgjigjen për Klan Kosova.