Ambasadori i BE-së në Zvicër – i sigurt për marrëveshjen e ardhshme

Keystone

Ambasadori i Bashkimit Evropian në Zvicër, Petros Mavromichalis, është i bindur se një paketë e ardhshme marrëveshjesh midis Zvicrës dhe BE-së do të përmbyllet.

Sipas tij, përparësitë janë shumë më të mëdha se çdo disavantazh i mundshëm, shkruan albinfo.ch.

“Unë mendoj se ka njëfarë sigurie se ajo që është në tryezë është mjaft afër një marrëveshjeje, për të cilën të dyja palët mund të bien dakord”, ka thënë ai për RTS.

Zvicra dhe BE-ja kanë negociuar çështje institucionale për gati 15 vjet dhe problemet konsiderohen të njohura.

Për Mavromichalis, ajo që do të fitojë Zvicra është në thelb ruajtja dhe forcimi i një modeli marrëdhëniesh me BE-në që është krijuar për t’iu përshtatur asaj.

“Përtej kësaj, ne do të jemi në gjendje të ndërtojmë dhe, për shembull, të lidhim tri marrëveshje të reja të kërkuara nga Zvicra”, u shpreh tutje ai.

Sigurimet e ofruara

Ambasadori është gjithashtu i prirur të qetësojë zviceranët për çdo humbje të mundshme të sovranitetit ose presion mbi pagat.

“Nuk po flasim për anëtarësimin e Zvicrës në BE, që do të thotë ndarje e sovranitetit me shtetet e tjera anëtare. Ne po flasim thjesht për pjesëmarrjen e Zvicrës në tregun e brendshëm dhe rrjedhimisht respektimin e rregullave të saj”, deklaroi ai.

Tutje, sa i përket presionit mbi pagat, Mavromichalis beson se kjo është vetëm një frikë ose një mashtrim, pasi siç tha, Zvicra nuk është një rast unik apo i izoluar. Shtetet anëtare të BE-së kanë nivele shumë të ndryshme të pagave dhe zhvillimit ekonomik.