Ansambli “Vatra” për vizitë në Konsullatën e Kosovës

E diela që shkoi ishte ditë feste për fëmijët e Ansamblit të Valleve „VATRA“ nga Bülachi i Cyrihut. Fëmijët për herë të parë po vizitonin Konsullatën e Republikës së Kosovës në Cyrih.

Fëmijët Ishin të lumtur, të hareshëm dhe të emocionuar, emocionin e shtonte edhe më shumë edhe për të tjerët që ishin pjesëmarrës, veshja e tyre kombëtare. Vizita e Ansamblit „VATRA“ udhëhiqej nga kryetari i Nexhmedin Jusufi dhe koreografet Arsim Berisha dhe Fatmire Kajtazi.

Konsulli i Republikës së Kosovës në Cyrih, Sali Sefa ka vlerësuar lartë aktivitetin 17 vjeçar të këtij Ansambli në kultivimin dhe ruajtjen e kulturës dhe traditës kombëtare shqiptare në Cyrih. Konsulli Sefa, gjithashtu është shprehur të jetë i kënaqur kur edhe 2 mijë kilometra larg atdheut i sheh fëmijët e vegjël në veshje kombëtare.

“Kjo është rruga që duhet ndjekur”, tha Sefa

“Të integrohemi patjetër, por jo të asimilohemi”, tha diplomati nga Kosova.

“Kjo nuk do të ishte e mundur edhe pa angazhimin e prindërve shqiptar që jetojnë në Zvicër, ndërsa madhështia e këtij aktiviteti të Ansamblit “VATRA” është kur kihet parasysh se i tërë ky angazhim është në baza vullnetare”, tha Sefa.

Gjatë kësaj vizite pjesëmarrës ishin edhe prindërit e fëmijëve të Ansamblit, që gjithashtu u inkuadruan në diskutimin e temave që kanë të bëjnë me kulturën dhe problemet me të cilat preokupohet mërgata jonë.

Me këtë rast, konsullata kosovare në Cyrih është dekoruar me 3 piktura nga Ansambli i Valleve “Vatra”.