“Apple”, me 876 miliardë dollarë, kompania më e shtrenjtë në botë

Nga kompanitë zvicerane, me vlerën e bursës prej 264 miliardë dollarësh, “Nestle” është e 18-ta në botë dhe e dyta në Evropë

Në mesin e 100 kompanive më të shtrenjta, ose të kuotuara më së larti në bursat botërore, vetëm 3 janë nga Zvicra. Më së larti në këtë listë është ranguar koncerni i madh zviceran i industrisë ushqimore “Nestle”. Me vlerën e bursës prej 264 miliardë dollarësh, “Nestle” është kompania e 18-të në botë dhe e dyta në Evropë, thuhet në një informatë të publikuar nga ndërmarrja konsultative EY, transmeton albinfo.ch.

Nga kompanitë zvicerane, në mesin e 100 më të shtrenjtave janë radhitur edhe dy kompanitë e njohura farmaceutike, “Roche”, në vendin e 31-të me 213 miliardë dollarë vlerë dhe “Novartis” në vendin e 37-të e cila kushton 195 miliardë dollarë.

Vendin e parë në Evropë dhe të 17-tin në botë për nga vlera e zë kompania holandeze e naftës “Royal Dutch Shell”, me 276 miliardë dollarë.

Ndërsa vetë kreun prej 10 vendeve të kësaj rangliste vazhdojnë ta popullojnë kompanitë amerikane dhe aziatike (nga këto të dytat, kryesisht kineze). Kështu, në vendin e parë, me vlerën 876 miliardë dollarë është edhe këtë vit kompania Apple, transmeton albinfo.ch. Pas saj vjen Google (Alphabet) dhe e treta është Microsoft.

Në Top-100-shin e kompanive më të vlefshme në botë hyjnë 54 nga Amerika e Veriut (SHBA dhe Kanadaja), 24 nga Evropa dhe 22 nga Azia. Por në mesin e 10 të parave ka vetëm kompani amerikane dhe aziatike.