Armët e Skenderbeut kthehen në Vjenë

Pas 45 ditëve që nga ardhja, armët tashmë janë paketuar dhe do të dërgohen në Vjenë

Gjatë dy muajve të ekspozimit të armëve të Skenderbeut në Muzeun Historik Kombëtar të Tiranës është shënuar një rekord vizitorësh, si asnjëherë më parë gjatë 32 vjetëve të këtij institucioni.

Drejtori i Muzeut Historik Kombëtar të Shqipërisë, Luan Malltezi, bëri të ditur për mediat e Tiranës se fluksi i vizitorëve nuk ka munguar as në ditën e fundit të ekspozimit të shpatave dhe përkrenares së Skënderbeut, ndërkohë që në total numri i vizitorëve është rreth 1 milionë e 700 mijë.

Pas 45 ditëve që nga ardhja, armët  tashmë janë paketuar dhe do të dërgohen në Vjenë.

Armët e Skenderbeut u rikthyen në Shqipëri pas 500 vjetësh. Ekspozita e armëve u çel me një ceremoni të veçantë me 10 roja nderi në hyrje të Muzeut Historik Kombëtar, dy prej të cilëve të veshur me veshje të Gardës historike të Skënderbeut.

Kërkesa për të sjellë në Shqipëri armët e Skënderbeut janë bërë disa herë që në kohën e Zogut, së fundi edhe në kuadër të 600-vjetorit të lindjes së Skënderbeut, por për shkak të kushteve dhe të mungesës së sigurisë përgjigjet kanë qenë gjithmonë negative.

Armët e Skënderbeut erdhën në Shqipëri në kuadër të 100-vjetorit të Pavarësisë dhe u cilësuan si një nga ngjarjet më të rëndësishme në kuadër të këtij jubileu. Prej vitit 1806 ato ndodhën në Muzeun Perandorak në Vjenë.