Arrestohen dy të dyshuar për mashtrim për punësime në Irak, Afganistan e Poloni

Policia e Kosovës ka arrestuar dy persona të dyshuar se kanë kryer veprën penale të “Mashtrimit”, e sanksionuar sipas Kodit penal të Republikës së Kosovës.

Arrestimi i tyre është bërë nga Drejtoria për Hetimin e Krimeve Ekonomike dhe Korrupsionit, Sektori për Hetime Financiare, pas ndërmarrjes se veprimeve hetimore dhe në koordinim me Prokurorinë Themelore në Ferizaj, transmeton Albinfo.ch.

“Të dyshuarit në vazhdimësi dhe në bashkëkryerje gjatë viteve 2021 – 2022 dyshohet se kanë mashtruar persona të ndryshëm në regjionin e Ferizajt duke u kërkuar para me qëllim të punësimit të tyre në Irak, Afganistan dhe Poloni, ku kanë kërkuar nga viktimat para në vlerë prej 2500 deri në 3000 euro me qëllim të sigurimit të kontratës së punës në një kompani”, njofton policia.

Në bazë të dëshmive të siguruara deri me tani, dyshohet se vlera e mashtrimit të përfituar nga të dyshuarit arrinë në 80 mijë euro, njofton policia.

Të dyshuarit janë intervistuar në prezencë të avokatëve mbrojtës, ku i dyshuari me iniciale (N.L.) me aktvendim të prokurorit është dërguar në mbajtje për 48 orë, ndërsa e dyshuara (K.L.) është liruar në procedurë të rregullt./Albinfo.ch