Arrestohet “bosi” i kontrabandës me emigrantë

Sipas Policisë së Kosovës, i arrestuari është D. S. i lindur me 1955 në komunën e Gjakovës. Atij i janë konfiskuar 21 pasaporta jugosllave dhe dokumente tjera

Autoritetet e Kosovës po tregojnë rezultate konkrete në luftën kundër trafikimit me emigrantë, duke e kuptuar se refugjatët e rremë në Bashkimin Evropian mbeten “kancer” për liberalizimin e vizave. Të mërkurën Policia e Kosovës konfirmo arrestimin e një bosi të kontrabandës me emigrantë.

“Njësiti i Hetimeve Rajonale në Gjakovë, ka realizuar një operacion policor, me ç’rast ka arrestuar një person me dyshimin se ka kryer veprën penale të kontrabandim me emigrantë”, njofton Policia e Kosovës.

Gjatë këtij operacioni, siç thuhet në njoftim, Policia ka realizuar një bastisje në fshatin Hereq në komunën e Gjakovës duke konfiskuar një numër të konsiderueshëm të dokumenteve, për të cilat dyshohet se i arrestuari i ka përdorur gjatë kryerjes së veprës penale.

Sipas Policisë, i arrestuari është D. S. i lindur me 1955 në komunën e Gjakovës.

Gjatë arrestimit atij i janë konfiskuar: 21 pasaporta jugosllave, 8 pasaporta të Republikës së Kosovës, 23 letërnjoftime të Republikës së Serbisë; 2000 (dy mijë) €, të holla të gatshme të cilat dyshohet të jenë pranuar nga viktimat e kontrabandimit;

214 certifikata të lindjes të Republikës së Serbisë, etj.

“Ky operacion policor është kryer duke  zbatuar një urdhër bastisje nga Gjykata Themelore në Gjakovë, Departamenti i krimeve të rënda. Të gjitha veprimet policore lidhur me këtë rast janë kryer nën autorizimin e prokurorit përkatës”, thuhet në njoftimin e Policisë.