Arrin ndihma nga Zvicra në Shqipëri

Dy aeroplanë kanë ardhur nga Rumania, kurse dy nga Turqia dhe Zvicra

Kryetari i Grupit Parlamentar të Partisë Socialiste, Taulant Balla dhe ambasadori i Rumanisë në Tiranë, Mircea Perpelea, kanë pritur në aeroportin e Rinasit mbërritjen e dy avionëve Hercules të ushtrisë rumune, me 52 specialistë për situata katastrofash natyrore, të pajisur me pajisje kërkimi nën rrënojat e ndërtesave.

Përmes një postimi në rrjetin social Facebook, numri dy i PS-së, Balla, deklaron se menjëherë pas mbërritjes skuadrat e kërkimit u nisën për të ndërhyrë në Durrës, raportojnë mediat shqiptare.

Gjithashtu Balla bën me dije se sapo mbërritën në Rinas edhe dy avionë nga Turqia dhe nga Zvicra, përcjell albinfo.ch.

“Vazhdojnë të mbërrijnë avionë të ndihmës nga Turqia, Rumania dhe Zvicra në Aeroportin Ndërkombëtar të Tiranës.

Shqipëria po kalon ditët më të vështira, ndaj solidaritet dhe mirënjohje për të gjithe ata që janë pranë njerëzve ne nevojë”, thuhet në njoftimin e Aeroportit të Rinasit.

---