Ashton “bashkon” Thaçin dhe Daçiqin

Baronesha Ashton mund të ndikoj që dy kryeministrat, Thaçi dhe Daçiq, t’ia shtrinë dorën njëri-tjetrit

Përfaqësuesja e lartë e Bashkimit Evropian për Politikë të Jashtme dhe Siguri, Catherine Ashton ka thirrur në Bruksel, kryeministrin e Kosovës Hashim Thaçi dhe atë të Serbisë, Ivica Daçiq për të koordinuar nisjen e dialogut ndërmjet dy vendeve. Takimet të cilat do të zhvillohen sot, fillimisht do të jenë të ndara. 

Qëllimi i këtij takimi, siç kanë njoftuar zyrtarë nga Brukseli, kryesisht ka të bëj me nisjen e dialogut të ndërsjellë, ndërsa nëse nuk ka kundërshtime, baronesha Ashton mund të ndikoj që dy kryeministrat e dy vendeve më të “armiqësuara” në Ballkan, t’ia shtrinë dorën njëri-tjetrit. 

Zëdhënësja e Catherine Ashton, Maja Kocijançic ka thënë për mediet e Prishtinës se takimet me shefen e BE-së, do ta zhvillohet ndaras. 

“Përfaqësuesja e lartë e BE-së, Catherine Ashton do të takohet në Bruksel me kryeministrin Daçiq. Ajo po ashtu do të takohet edhe me kryeministrin Thaçi. Qëllimi i këtij takimi është për të diskutuar rinisjen e dialogut të lehtësuar nga BE”, thuhet në komunikatën e lëshuar nga Kocijançiq. 

Ndërsa gazeta “Zëri” duke u thirrur nga burimet  veta nga Brukseli, thotë se ka mundësi që takimi i sotëm të mos zhvillohet ndaras. 

“Unë besoj se do të ketë insistime nga ana e përfaqësueses Ashton që ajo të ulet njëherësh me  dy kryeministrat në një tavolinë dhe të diskutojë. Ky është edhe qëllimi i Ashton, e cila i ka ftuar ata si një parapërgatitje për rinisjen e dialogut”, ka thënë ky burim. 

Të dy shtetet ndërkaq, janë deklaruar për vazhdimin e bisedimeve për zgjidhjen e çështjeve të hapura. Kosova dje ka nxjerrë një rezolutë me të cilën kërkohet normalizimi i raporteve me Serbinë, ndërsa kjo e fundit ka hartuar një platformë për negociata me Kosovës. 

Krijimi i raporteve fqinjësore është normë elementare e Bashkimit Evropian për të gjitha shtetet që synojnë apo aspirojnë integrimin në BE. Edhe Kosova edhe Serbia tashmë janë deklaruar se rruga e vetme, prioritare e tyre, mbetet integrimi në strukturat euro-atlantike.