Austria ka shënuar Ditën e saj Kombëtare në Kosovë me një pritje ku morën pjesë miq, partnerë dhe përfaqësues institucionalë. Në këtë aktivitet u theksuan marrëdhëniet ndërmjet dy vendeve dhe mbështetja e vazhdueshme austriake për rrugën evropiane të Kosovës, përcjell albinfo.ch.
Në njoftimin e Ambasadës së Austrisë në Kosovë u rikujtua se, 71 vjet më parë, Austria miratoi ligjin për neutralitetin e përhershëm, duke përcaktuar statusin e saj si shtet ushtarakisht neutral. Megjithatë, sipas ambasadës, ky neutralitet nuk nënkupton indiferencë politike ndaj zhvillimeve ndërkombëtare.
Ambasada theksoi përkushtimin e Austrisë ndaj së drejtës ndërkombëtare, të drejtave të njeriut dhe parimit që sundimi i ligjit duhet të mbizotërojë ndaj mendësisë se më i forti ka gjithmonë të drejtë.
Këto vlera, sipas njoftimit, do ta udhëheqin edhe angazhimin e Austrisë si anëtare jo e përhershme e Këshillit të Sigurimit të Kombeve të Bashkuara gjatë mandatit 2027–2028. Austria është zgjedhur për këtë mandat në qershor të këtij viti.
Në raport me Kosovën, ambasada riafirmoi përkushtimin për forcimin e lidhjeve ndërmjet qytetarëve të të dyja vendeve dhe vazhdimin e mbështetjes për integrimin e Kosovës në Bashkimin Evropian.
Një falënderim i veçantë iu drejtua presidentes së Kosovës, Justina Shiroka Pula, për pjesëmarrjen në pritje dhe fjalimin e mbajtur me këtë rast.
