Autori i sulmit në darkën e Shtëpisë së Bardhë kishte synim zyrtarët e administratës Trump

Prokurori i Përgjithshëm në detyrë i Shteteve të Bashkuara të Amerikës, Todd Blanche ka deklaruar se bazuar në gjetjet paraprake i dyshuari ka të ngjarë të ketë pasur në shënjestër zyrtarët e administratës Trump gjatë sulmit të tij të shtunën, në darkën e Korrespondentëve të Shtëpisë së Bardhë.

“Ne ende po hetojmë një motiv, dhe kjo është diçka që domosdoshmërisht do të zgjasë të paktën disa ditë. Ne besojmë se ai ka pasur në shënjestër zyrtarët e administratës në këtë sulm, tentativë sulmi, por kjo është përsëri, paraprake”, ka thënë ai për NBC.

Sipas tij, këta zyrtarë ka gjasa të përfshijnë presidentin e SHBA-së teksa shtoi se nuk beson që i dyshuari po bashkëpunon me hetimin.

Ai njoftoi se i njëjti do të akuzohet në gjykatën federale nesër për sulm ndaj një oficeri federal, qitje me armë zjarri dhe përpjekje për të vrarë një oficer federal, teksa tha se nuk e dinte nëse kishte një lidhje të Iranit me sulmin, transmeton albinfo.ch.

Hetuesit besojnë se i dyshuari udhëtoi me tren nga Los Angeles në Çikago dhe më pas nga Çikago në Uashington DC me tren, përpara se të regjistrohej në hotelin ku u mbajt darka.