Kryetari i Komunës së Mitrovicës, Agim Bahtiri, pasi iu ka uruar mërgimtarëve pushim të mirë në vendlindjen e tyre, ka thënë se roli dhe kontributi i mërgimtarëve gjatë dekadave të tëra deri në ditët e sotme, në mbështetje të atdheut, në forma nga më të ndryshmet, ishte i  jashtëzakonshëm.

“Përkrahja juaj për çlirimin dhe zhvillimin e Republikës së Kosovës dhe natyrisht edhe të komunave tuaja nga ju vini ishte e shumëllojshme dhe e pakursyer deri në vetëmohim, prandaj edhe meritoni respektin më të thellë dhe vëmendjen e merituar të institucioneve tona të lira e demokratike”, shkruan faqja zyrtare e Komunës së Mitrovicës, përcjell albinfo.ch.

Murati u thotë mërgimtarëve: “Ju i jepni jetë Kosovës”

Ndërkohë lëvdata për mërgimtarët ka dhënë edhe ministri i Diasporës, Valon Murati, i cili ka theksuar se diaspora vazhdon të mbetet kontribuuesi më i madh për shtetin tonë, kurse ardhja e mërgimtarëve gjatë muajve të verës i japin shpirt Kosovës.”Realisht Kosova po qe se nuk do të vinit ju dhe ta ngjallni në këta muaj të verës, do të ishte një vend shumë i zymtë. Ju i jepni jetë Kosovës! Në këta muaj Kosova ka qarkullimin më të madh të parave. Kontributi juaj ka qenë shumë i madh për lirinë dhe pavarësinë e vendit”, tha ai ndër të tjera.

Më pas për të pranishmit u shfaq edhe një program i pasur artistik, në të cilën morën pjesë artistët nga Shkodra, Bruno dhe Paskaulina Shllaku, si dhe anëtarët e shoqërive artistike nga Mitrovica dhe Obiliqi.

Në kuadër të këtij aktiviteti është hapur edhe ekspozita me piktura e piktorëve nga Mitrovica dhe një ekspozitë shitëse e veshjeve tradicionale kombëtare.

Albinfo.ch