Bajrami ndau mirënjohje për matematikanët e rinj

Bajrami ka uruar nxënësit pjesëmarrës dhe Shoqatën e Matematikantëve të Kosovës për përfaqësimin dinjitoz të Kosovës në Olimpiadë dhe ka vlerësuar lartë rezultatet e treguara të pjesëmarrësve

Ministri në detyrë i Arsimit, Arsim Bajrami, u ndau të mërkurën shpërblime dhe mirënjohje nxënësve fitues dhe pjesëmarrës në Olimpiadën  Ndërkombëtare të Matematikës e cila u mbajt në Brazil gjatë këtij muaji.

Bajrami ka uruar nxënësit pjesëmarrës dhe Shoqatën e Matematikantëve të Kosovës për përfaqësimin dinjitoz të Kosovës në Olimpiadë dhe ka vlerësuar lartë rezultatet e treguara të pjesëmarrësve dhe përkushtimin e tyre për tu kthyer me medalje nga kjo garë.

Bajrami theksoi se, pjesëmarrësit e Olimpiadës Ndërkombëtare të Matematikës janë kthyer me rezultate të lakmueshme, duke përfshirë edhe medaljen  e bronztë, në mesin e një konkurrence të më shumë se 100 shteteve.

“Ky rezultat tregon që ne kemi nxënës inteligjentë dhe tregon se nuk është e pamundur që të ndërtohet një sistem cilësor i arsimit, në mënyrë që nxënësit tanë të jenë plotësisht të barabartë me nxënësit e botës. Kemi pritur nxënësit dhe MASHT ka ndarë çmime për ta, duke filluar me 1000 euro për fituesin e medaljes së bronztë dhe çmime të tjera”, është shprehur ministri Bajrami.

Ndër të tjera, ministri ka bërë të ditur se MASHT do të ndajë edhe bursa shtetërore për këta nxënës, ndërkaq ka falënderuar Shoqatën e Matematikanëve të Kosovës  dhe Institutin ATOM, të cilët kanë punuar me ekipin e nxënësve.

Nxënësi Shend Zhejiqi, nxënës i Gjimnazit Matematikor të Prishtinës, fitues i Medaljes së Bronztë në këtë Olimpiadë u shpërblye me 1000 euro, nxënësit Ardita Berisha dhe Viktor Ahmeti u shpërblyen me nga 500 euro, kurse nxënësit Alban Elezi dhe Flutura Shabani me nga 300 euro. Nxënësit, po ashtu u shpërblyen edhe me nga një gift-card, në vlerë prej 99 euro, me të cilën mund të pajisen me titujt të ndryshëm, në njërën nga libraritë e kryeqytetit.