Banka Qendrore e Maqedonisë ulë normën bazë të kamatave

Banka Popullore e Maqedonisë së Veriut ka njoftuar se ka liruar politikën monetare duke e ulur normën bazë të kamatave. 

Kjo normë është ulur për 0.25 pikë përqindjesh dhe tani është 2.25%. Kjo kamatë është bazë sipas të cilës llogariten të gjitha kamatat e tjera të kredive edhe për qytetarët edhe për kompanitë. 

Nga Banka Popullore thonë se ulja e kamatave është reflektim i  lëvizjeve të mëtutjeshme të volitshme të tregut devizor, që krijojnë pritje të qëndrueshme te biznesmenët, raporton televizioni Alsat. 

“Vendimi për uljen e normave të kamatës bazohet në vazhdimësinë e qëndrueshme të lëvizjeve të volitshme në tregun devizor, që tregon se nuk ka presione në sektorin e jashtëm dhe pikëpamjeve të qëndrueshme të subjekteve vendore. Gjithashtu lëvizjet rrjedhëse tregojnë rritje të matur të çmimeve vendore, e me këtë edhe mungesën e presioneve nga çmimet”, thuhet në njoftimin e Bankës Popullore.