Basha: Duam ligj për ndalimin e portretit të Enver Hoxhës

Kreu opozitar në Shqipëri, Lulzim Basah, ka deklaruar se PD-ja do të angazhohet që ta dërgoj në Kuvend një ligj për ndalimin e simboleve të komunizmit. Njoftimin Basha e bëri pasi ka bërë homazhe në varrezat e Dëshmorëve dhe memorialin e Përkujtimit të Viktimave të Komunizmit. Në këtë ngjarje pati edhe përplasje mes simpatizantëve të Partisë Demokratike dhe nostalgjikëve të komunizmit.

“Partia Demokratike është e angazhuar të çojë në Parlament ligjin për ndalimin e  simboleve të komunizmit, dekomunistizimin e Shqipërisë, nderimin e plotë për heronjtë që dhanë jetën për një Shqipëri të lirë dhe  demokratike por nga ana tjetër për të bërë të qartë se kurrë më nuk do të pranojmë rikthimin e të shkuarës së  përgjakshme dhe të dhimbshme për të cilën shqiptarët kanë paguar çmimin  më të shtrenjtë në Evropë.  Dhe kjo do të nisë me ndalimin e simboleve të komunizmit dhe portretit të gjakatarit Enver Hoxha”, ka thënë Basha.