Basha kërkon nga bizneset shqiptare që të kthejnë sytë nga Kosova

Bashkia e Tiranës, në kuadër të politikave të zhvillimit ekonomik të kryeqytetit, do të krijojë terrenin e përshtatshëm për të afruar biznesin e Tiranës, me atë në Prishtinë, Shkup, Tetovë, me të gjithë tregun shqipfolës, me synim krijimin e një afiniteti më të madh për mallrat dhe shërbimet shqiptare.

Kryebashkiaku, Lulzim Basha, i pranishëm në mbledhjen e Bordit Drejtues të shoqatës “BiznesAlbania”, ku bisedoi me përfaqësuesit e bizneseve, për nevojën e ridimensionimit të modelit të zhvillimit ekonomik të Tiranës, theksoi edhe rëndësinë e tregut shqipfolës, shkruan media shqiptare.

“Tregu ynë është një treg me një specifikë të veçantë, bëhet fjalë për tregun e Republikës së Shqipërisë, por edhe për një treg tjetër që duhe t’a ndikojmë fuqishëm, siç është tregu shqipfolës. Keni 400 milion euro potencial të pashfrytëzuar me Kosovën që sot është volumi tregëtar Kosovë- Serbi. Nuk dua të bëj patriotin retorik, por dua t’ju them që është një potencial i pashfrytëzuar”, ka deklaruar Basha.

Sipas mediave të Tiranës, ai u ka bërë thirrje bizneseve që t’i drejtojnë sytë nga Kosova.

Për këtë qëllim, Basha u ka thënë përfaqësuesve të bizneseve që të bashkërendojnë punën me kolegët në Kosovë.

Në këtë mbledhje, ku u diskutuan çështjet që shqetësojnë komunitetin e biznesit të Tiranës, Basha ripohoi edhe njëherë vullnetin e tij për të krijuar një partneritet të drejtë mes Bashkisë së Tiranës dhe biznesit.