BBC: Fëmijët që po mbahen ngujuar nga gjakmarrja në Shqipëri

Gjiganti britanik BBC i ka kushtuar një shkrim për gjakmarrjen në Shqipëri të titulluar “Fëmijët që po mbahen ngujuar nga gjakmarrja në Shqipëri”, e ku në qendër të vëmendjes janë fëmijët e ngujuar që banojnë në qytetin e Shkodrës, shumë prej të cilëve praktikisht lindin në gjak, e duhet të kenë frikë për jetët e tyre.

“Thuhet se hakmarrja është pjatë që shërbehet e ftohtë dhe në Shqipëri mund të jetë vërtet e tillë”, në këtë mënyrë e nis lajmin BBC. Gjakmarrja, vazhdon të mbetet ende edhe sot mjaft e fuqishme, me 68 familje në rajonin e Shkodrës, aktualisht të paafta, të lëna në shtëpitë e tyre nga frika se kjo do t’i kushtojë jetën, përcjell albinfo.ch.

Reportazhi ngrihet mbi historinë e Nikos, 13-vjeçar, i detyruar të qëndrojë brenda 4 mureve për krime të kryera përpara se ai të kishte lindur.

Historia e marrjes së gjakut në familjen e Nikos fillon pak pas krizës së thellë ekonomike të shkaktuar nga rënia e firmave piramidale. Mësuesja e Nikos, Liljana Luani i shpjegoi BBC-së se po të respektohet deri në fund Kanuni, atëherë gratë dhe fëmijët nuk mund të vriten. “Sot nuk po ndiqen më as rregullat e tij e as ligjet e shtetit, e në këtë drejtim, autoritetet e zbatimit të ligjit nuk po bëjnë aq sa duhet”, ka thënë mësuesja.

E, shefi i Policisë së Shkodrës, Gjovalin Loka mbrohet duke thënë se është bërë gjithçka për të parandaluar dhe hetuar gjakmarrjet.