BE hap aplikimet për DiscoverEU, të rinjtë 18-vjeçarë mund të udhëtojnë falas me tren në Evropë

Përveç biletës falas, pjesëmarrësit marrin edhe një kartë rinore DiscoverEU, e cila ofron zbritje për vizita kulturore, aktivitete mësimore, sport, transport, akomodim dhe ushqim

Të rinjtë 18-vjeçarë në Evropë mund të aplikojnë sërish për programin DiscoverEU, i cili u mundëson të udhëtojnë falas nëpër Evropë, kryesisht me tren, për deri në 30 ditë. Sipas njoftimit të Qeverisë Gjermane, raundi aktual i aplikimeve është hapur më 8 prill 2026 dhe do të zgjasë deri më 22 prill 2026.

Në kuadër të kësaj nisme të Bashkimit Evropian, dy herë në vit ndahen rreth 40 mijë Travel Pass për 18-vjeçarët evropianë. Të përzgjedhurit do të kenë mundësi të udhëtojnë ndërmjet 1 korrikut 2026 dhe 30 shtatorit 2027, duke eksploruar vende të ndryshme të Evropës dhe duke njohur më nga afër larminë kulturore e natyrore të kontinentit.

Përveç biletës falas, pjesëmarrësit marrin edhe një kartë rinore DiscoverEU, e cila ofron zbritje për vizita kulturore, aktivitete mësimore, sport, transport, akomodim dhe ushqim, njofton www.bundesregierung.de, transmeton albinfo.ch.

Aplikimi mund të bëhet si individ ose në grup, ndërsa një grup mund të ketë deri në pesë anëtarë. Për të qenë të pranueshëm, kandidatët duhet të kenë lindur ndërmjet 1 korrikut 2007 dhe 30 qershorit 2008, të jenë shtetas ose banorë të ligjshëm të një shteti anëtar të BE-së ose të një vendi të lidhur me programin Erasmus+, si Islanda, Lihtenshtajni, Maqedonia e Veriut, Norvegjia, Serbia ose Turqia. Gjithashtu, ata duhet të marrin pjesë në një kuiz.

Programi DiscoverEU është lansuar në vitin 2018 dhe, sipas të dhënave zyrtare, deri më tani mbi 430 mijë të rinj nga e gjithë Evropa kanë përfituar nga ky program për të zbuluar kontinentin.

https://www.bundesregierung.de/breg-de/aktuelles/discover-eu-zug-durch-europa-2170394?fbclid=IwY2xjawRGMONleHRuA2FlbQIxMABicmlkETE5SXp0T1ZsUklMWDlLTWtVc3J0YwZhcHBfaWQQMjIyMDM5MTc4ODIwMDg5MgABHslCzILwoPq4EMzjQGa3iq1y6hjPuG1l0ealQm0ajdESirPOBlzc1z0gA5TY_aem_PHLsjfJltkUwQdYD-sX91g

 

---