BE-ja miraton udhërrëfyesin për Kosovën

Në Bruksel është finalizuar lista e kushteve për Kosovën, plotësimi i të cilave do të krijonte mundësinë e udhëtimit pa viza për kosovarët

Ministrja Vlora Çitaku dhe zëvendëskryeminstri Hajredin Kuçi, të cilët ndodhen në Bruksel, kanë konfirmuar për mediat kosovare, vendimin e BE-së.

Ky udhërrëfyes do t’i dorëzohet në Bruksel ministres për Integrime Evropiane, Vlora Çitaku, në mesin e qershorit.

Marrja e udhërrëfyesit nuk nënkupton se liberalizimi për një vend që aspiron të përfitojë nga ky program, është e garantuar.

Plotësimi i kushteve, që në rastin e Kosovës janë edhe më të rënda sesa ato për vendet e Ballkanit perëndimor, që tashmë përfiutojnë nga ky program, do t’i siguronte edhe Kosovës dritën jeshile në dialogun për vizat.

Qeveria e Kosovës pretendon se shumicën e kushteve tashmë i ka të plotësuara, dhe nuk pret që do të zgjasë shumë procesi i finalizimit të dialogut, mirëpo ekspertë të çështjeve që kanë të bëjnë me BE-në, presin që procesi do të zgjasë mesatarisht deri në dy vjet, raportojnë mediat kosovare.