BE me rekord investimesh në ushtri, 240 miliardë euro për shpenzime ushtarake

(KEYSTONE/Gaetan Bally)

Shpenzimet ushtarake në Bashkimin Evropian prekën rekordin e 240 miliardë eurove në 2022-shin, 6% më shumë se në vitin paraardhës.

Lajmin e bëri të ditur Agjencia Evropiane për Mbrojtjen. Bëhet fjalë për vitin e tetë rresht që në bllok ka një rritje, e nxitur edhe për shkak të luftës në Ukrainë.

Gjashtë nga 27 vendet anëtare i rritën shpenzimet ushtarake me mbi 10 për qind vitin e kaluar. Suedia ishte ajo që e rriti me mbi 30 për qind, teksa vendi pret të anëtarësohet në NATO, transmeton euronews përcjell albinfo.ch.

Vende të tjera megjithatë e shmangën trendin. Franca i rriti shpenzimet në fushën e mbrojtjes me vetëm 0.7 për qind në 2022-shin.

Në tërësi, vendet e Unionit i kushtuan 1.5 për qind të GDP-së së tyre sektorit në fjalë, shumë larg objektivit prej 2 për qind të vendosur nga NATO, ku bëjnë pjesë 22 shtete anëtare.

Konkretisht, investimet u rritën me 58 miliardë euro, ka saktësuar Agjencia Evropiane për Mbrojtjen, përgjegjëse për përmirësimin e kapaciteteve luftarake të bllokut.

Por pavarësisht rritjes së shpenzimeve, industria ushtarake e kontinentit të vjetër nuk mund të përmbushë kërkesën për armatime të Ukrainës, e cila vazhdon të luftojë pushtimin rus.

Evropianët janë zotuar se do të furnizojnë me 1 milionë bomba Kievin brenda marsit, edhe pse ky premtim duket i paarritshëm.