BE propozon ri-emërtim të regjimit të sanksioneve për të drejtat e njeriut, në emër të Navalnyt

Foto FB: Алексей Навальный

Shefi i politikës së jashtme të Bashkimit Evropian, Josep Borrell, gjatë takimit të liderëve të Bashkimit Evropian në Bruksel, ka thënë se blloku duhet t’i dërgojë një mesazh mbështetjeje opozitës ruse pas vdekjes së rivalit më të madh të presidentit Vladimir Putin, Alexei Navalny, transmeton albinfo.ch.

Sipas raportimeve nga BBC, anëtarët pritet të diskutojnë sanksionet e reja kundër Rusisë teksa planifikohet t’i vendosin ato deri në dy vjetorin e luftës në Ukrainë.

Borrell propozoi gjithashtu që BE-ja të riemërtojë regjimin e saj të sanksioneve për të drejtat e njeriut, i cili synon individët dhe entitetet përgjegjëse për shkelje të rënda të të drejtave të njeriut, në emrin e Navalnyt.

Në anën tjetër edhe ministja e Jashtme e Gjermanisë, Annalena Baerbock ka thënë se do të kërkohen më shumë sanksione kundër Rusisë për vdekjen e Navalnyt. Ajo u shpreh se shpreson që blloku 27-vendesh do të binte dakord për sanksione të reja kundër Rusisë së shpejti.

“Kemi parë forcën brutale me të cilën presidenti rus shtyp qytetarët e tij që dalin në rrugë për të demonstruar për liri ose për të shkruar për të në gazeta. Do të propozojmë sanksione të reja në dritën e vdekjes së Alexei Navalnyt”, ka thënë ajo.