BE synon të hapë tregun e kërkimit online – Google mund të detyrohet të ndajë të dhënat me rivalët

@unsplash

Komisioni Evropian ka propozuar masa të reja që do të detyronin Google të ndajë disa të dhëna të rëndësishme të motorit të kërkimit me kompani rivale, në kuadër të Aktit të Tregjeve Digjitale (DMA).

Sipas KE-së, kjo nismë ka për qëllim rritjen e konkurrencës në tregun e kërkimit online dhe krijimin e mundësive më të barabarta për motorët e tjerë të kërkimit që të konkurrojnë me Google Search.

Propozimi parashikon që Google të japë qasje në të dhëna si renditja e rezultateve, kërkimet, klikimet dhe shikimet, por gjithmonë në kushte të drejta, të arsyeshme dhe jo diskriminuese. Po ashtu, përfshihen edhe rregulla për mënyrën e ndarjes së të dhënave, shpeshtësinë e tyre dhe mbrojtjen e privatësisë përmes anonimizimit.

Komisioni ka theksuar gjithashtu se edhe shërbimet e inteligjencës artificiale me funksione kërkimi mund të përfitojnë nga këto të dhëna për të përmirësuar shërbimet e tyre.

Palët e interesuara do të kenë mundësi të japin komentet e tyre në një konsultim publik që nis më 17 prill, ndërsa procesi pritet të përfundojë brenda gjashtë muajve.