BE u kërkon vendeve anëtare që t’i japin Ukrainës armë shpejt

Presidentja e Komisionit Evropian u ka kërkuar vendeve anëtare që të furnizojnë Ukrainën me sisteme armësh “shpejt” dhe sugjeroi që një raund tjetër i sanksioneve të BE-së mund të synojë Sberbank-un e fuqishëm të Rusisë dhe të përfshijë një embargo ndaj naftës ruse.

“Kjo vlen për të gjitha vendet anëtare: ata që munden, duhet të dërgojnë armë shpejt, sepse vetëm në këtë mënyrë Ukraina mund të mbijetojë në betejën e saj akute mbrojtëse kundër Rusisë”, tha Ursula von der Leyen për gazetën gjermane Bild, përcjell albinfo.ch.

Disa vende evropiane duket se po lëkunden për eksportin e armëve të rënda, si tanke apo avionë luftarakë, mes shqetësimeve se një veprim i tillë mund ta përshkallëzojë zyrtarisht luftën në Ukrainë në një konflikt të drejtpërdrejtë midis Rusisë dhe vendeve anëtare të NATO-s.

Von der Leyen u kërkoi udhëheqësve evropianë të mos vonojnë vendimet për dallimet në kategori.

“Unë nuk bëj dallim midis armëve të rënda dhe të lehta”, tha ajo.

“Ukraina duhet të marrë gjithçka që i nevojitet për të mbrojtur veten dhe atë që mund të përballojë”, përcjell tutje albinfo.ch.