BE: Zëvendësimi i tabelave në Veri duhet të bëhet pas konsultimeve me Komisionerin e Gjuhëve

Shefi i Zyrës së Bashkimit Evropian në Kosovë, Tomas Szunyog, këtë të premte ka thënë se vendimi për zëvendësimin e tabelave në veri duhet të zbatohet vetëm pas konsultimeve me Komisionerin e Gjuhëve dhe duke interpretuar pozitivisht Ligjin për Përdorimin e Gjuhëve.

“Me iniciativën e fundit për zëvendësimin e tabelave zyrtare që tregojnë emrat e vendeve në veri të Kosovës, u bëj thirrje autoriteteve që ta zbatojnë procesin vetëm pas konsultimit me Komisionerin e Gjuhëve dhe duke interpretuar pozitivisht Ligjin për Përdorimin e Gjuhëve. Kjo do të thotë të merren parasysh komunitetet e prekura”, ka shkruar ai në “X”.

Të enjten institucionet e Kosovës kanë zëvendësuar tabelat me emërtimet e vendbanimeve në gjuhë cirilike me tabela, në të cilat emri i vendbanimit shkruhej edhe në gjuhën shqipe.

Të premten, shumica e tabelave janë ngjyrosur aty ku emri i vendbanimit ishte në gjuhën shqipe.