Bernë: Infektohet me Covid-19 një nxënës i kopshtit të fëmijëve

Megjithatë, në kopshtin e fëmijëve, mësimet vazhdojnë normalisht dhe nuk është vendosur karantina

Testimi për koronavirus i një fëmije parashkollor, në një kopsht fëmijësh në Lyssach BE, ka rezultuar pozitiv. Megjithatë, në kopshtin e fëmijëve, mësimet vazhdojnë normalisht dhe nuk është vendosur karantina, shkruan sda.ch.

Siç thotë Gundekar Giebel nga Drejtoria e Shëndetit në Bernë, është arritur që të identifikohen të gjithë edukatorët e fëmijëve dhe bëhet fjalë për një numër të vogël njerëzish, transmeton albinfo.ch. Pasi është këshilluar me Drejtorinë e Arsimit dhe Kulturës, zyra kantonale e mjekësisë ka vendosur të vazhdohet mësimi.

Nëse fëmijët dhe kujdestarët/edukatorët e tyre në Lyssach do të tregojnë simptoma të një sëmundje të frymëmarrjes, Departamenti i Shëndetit i Kantonit të Bernës rekomandon që ata të qëndrojnë në shtëpi dhe të kontaktojnë mjekun e tyre. Ata gjithashtu duhet të jenë në gjendje të testohen.

Mbyllet një çerdhe fëmijësh në Biel

Por në Biel, po ashtu në Kantonin e Bernës nga ana tjetër, një qendër e kujdesit ditor (çerdhe fëmijësh) është mbyllur të premten e kaluar, përcjell albinfo.ch. Kjo ka ndodhur pasi që një person nga ekipi i kujdesit ishte infektuar me virusin e koronës. Qendra në fjalë mbetet e mbyllur gjatë periudhës së karantinës që do të zgjasë deri më 15 qershor.

I gjithë personeli i kujdesit ditor që ka qenë në kontakt me personin e infektuar duhet të testohet dhe të mbetet në karantinë për kohën e përcaktuar nga zyra mjekësore kantonale.

---