BERZH: Maqedonia, 2.5% rritje ekonomike

Banka Evropiane për Rindërtim dhe Zhvillim konfirmon parashikimin e nëntorit për rritjen ekonomike të Maqedonisë për vitin 2018. Sipas BERZH-it, kjo rritje për Maqedoninë e sapodalë nga kriza do të jetë 2,5%.

“Seenews” shkruan se në raportin më të ri të Prospektit Rajonal Ekonomik, që përgatitet nga BERZH-i, rritja ekonomike e Maqedonisë për vitin 2019 do të jetë 3.0%, përcjell albinfo.ch.

Raporti thotë se rritja e rrogës minimale dhe aspektet e tjera të masave për mbrojtje sociale do të ndikojnë në rritjen e Bruto Prodhimit Vendor në këtë vit.

Gjithashtu, parashihet rritje e eksporteve të Maqedonisë, për shkak të parashikimeve për rritje ekonomike në Bashkimin Evropian, që është partneri kyç i tregtisë për Maqedoninë.

Megjithatë, BERZH-i konstaton se rreziqet e rënies mbeten të rëndësishme, pasi që ndjeshmëria e investimeve do të përkeqësohej, nëse pasiguria politike do të rritej më tutje.