Biden letër Vuçiqit: Marrëveshja me Kosovën, hap kyç për stabilitet në rajon dhe Evropë

(AP Photo/Susan Walsh)

Presidenti i Serbisë, Aleksandar Vuçiq, ka pranuar një letër urimi nga presidenti i SHBA-së, Joe Biden, me rastin e festës kombëtare të 15 shkurtit, raportojnë mediat në Serbi, përcjell albinfo.ch.

Në letrën e Biden drejtuar Vuçiqit, pos tjerash, thuhet që SHBA-ja do të mbështesë Serbinë drejt anëtarësimit në BE.

Tutje raportohet se Biden në letrën e tij ka inkurajuar Serbinë që të vazhdojë me progresin e arritur vitin e kaluar në dialogun me Kosovën, i cili ndërmjetësohet nga BE-ja.

“SHBA-ja mbështet rrugën e Serbisë drejt anëtarësimit në BE dhe mbetet e përkushtuar për të ndihmuar Serbinë të forcojë institucionet e saj demokratike drejt përmbushjes së këtij qëllimi”, thuhet në letrën e Biden.

Presidenti amerikan ka përmendur edhe çështjen e marrëveshjes me Kosovën.

“Marrëveshja për normalizim dhe implementimi i saj paraqesin hapa kyçë drejt një të ardhme më të qetë dhe të suksesshme për Serbinë, rajonin dhe Evropën”, nënvizohet në urimin e presidentit të SHBA-së.