Bislimi: Pa nënshkrim të marrëveshjeve, nuk mund të ecet drejt zbatimit

Besnik Bislimi

Zëvendëskryeministri i parë, njëherësh kryenegociatori i Kosovës për dialogun me Serbinë, Besnik Bislimi, ka thënë se takimet e sotme në Bruksel kanë përfunduar pa një takim trepalësh, sepse nuk ka pasur nevojë për diçka të tillë, ndërsa e ka konfirmuar se në takim me Lajçakun është diskutuar për një plan të sekuencuar të zbatimit të Marrëveshjes për normalizim të marrëdhënieve mes dy vendeve, si dhe për aneksin e zbatimit, përcjell albinfo.ch.

“Gjatë javës së kaluar, zoti Lajçak na e ka sjellë një draft të ri, i cili e fut për herë të parë paralelizmin e plotë në zbatimin e Marrëveshjes, apo zbatim më të balancuar, dhe ne jemi përpjekur që për këtë draft t’i japim komentet finale, në mënyrë që i njëjti të jetë i pranueshëm edhe për palën tonë. Mendoj se ka pasur gatishmëri të madhe të Lajçakut që t’i akomodojë propozimet tona dhe të gjitha janë argumentuar mirë në detaje”, ka thënë ai, pas takimit.

I pyetur në qoftë se është diskutuar për draft-statutin për formim të Asociacionit të komunave me shumicë serbe në Kosovë, ai ka deklaruar se kjo pikë ka qenë në agjendë, por pala kosovare e ka bërë të qartë qëndrimin e vet qysh më 26 tetor, kur kryeministri i Kosovës, Albin Kurti, ka biseduar me zyrtarët perëndimorë.

Sipas tij, duhet të ketë nënshkrim të draft-statutit dhe Marrëveshjes për normalizim, në mënyrë që ato të zbatohen.

“Nuk mund të nisë zbatimi pa nënshkrim, sepse duhet garancia që kemi një marrëveshje valide, që sjell obligime edhe për palën tjetër”, ka thënë ai.

Ndër të tjera, ai ka njoftuar se në takim është diskutuar edhe për çështje të energjisë, për regjistrimin e makinave me targa ilegale serbe në RKS dhe për mbajtje të zgjedhjeve në komunat në veri të Kosovës.

Sa i përket një takimi të radhës në kuadër të dialogut mes kryeministrit të Kosovës, Albin Kurti dhe presidentit serb, Aleksandar Vuçiq, deri në fund të vitit, ai ka thënë se Lajçak nuk ka përmendur datë konkrete.