Blatter bashkon Vokrrin dhe Karaxhiqin

Kryetari i FIFA-s, Sepp Blatter ka ftuar të martën në një takim të përbashkët, Fadil Vokrrin dhe Tomislav Karaxhiqin. Temë do të jetë futbolli në rajon, në veçanti në Kosovë

Pavarësisht motos, “në futboll nuk ka politikë”, megjithatë futbollistët kosovarë për shkak të ndikimeve politike kanë mbetur të margjinalizuar tash e 14 vjet. Që t’u hiqet bllokada të paktën për lojëra miqësore, shefi i FIFA-s, Sepp Blatter ka ftuar të martën në një takim të veçantë, Fadil Vokrrin dhe Tomislav Karaxhiqin.

Vokrri dhe Karaxhiq përfaqësojnë dy federatat e futbollit, i pari të Kosovës dhe i dyti të Serbisë. Ftesa nga FIFA tashmë ka mbërritur në Federatën e Futbollit të Kosovës (FFK), sikurse në Federatën e Futbollit të Serbisë (FSS).

Në këtë takim, Vokrri e Karaxhiq do të shoqërohen nga sekretarët e federatave përkatëse.

Në ftesën e Blatterit thuhet se temë diskutimi në takimin trepalësh do të jetë çështja e futbollit në rajon, por temë boshte e këtij takimi, siç ka thënë për “Tribunën”, sekretari i FFK-së, Eroll Salihu, do të jetë çështja e futbollit kosovar.

Salihu ka thënë se Blatter e ka organizuar këtë takim trepalësh rreth gjetjes së ndonjë mënyre që Kosova të zhvillojë ndeshje miqësore ndërkombëtare pa kushtëzime, deri në anëtarësimin e plotë të saj në UEFA e FIFA, e jo me kufizime, siç iu kishin vendosur në maj të vitit të kaluar.

“Kërkesa jonë dhe insistimi ynë është që të luajmë pa kushtëzime. Madje, ne duam të luajmë edhe me Përfaqësuesen A të Kosovës, pa asnjë kushtëzim”, deklaroi Salihu.

Ndryshe mosnjohje e Kosovës nga pesëshja e BE-së (Spanja, Qiproja, Sllovakia, Greqia dhe Rumania) përveç ndikimeve politike, ka pasur refleksione edhe në arenën sportive. Përveç disa sporteve që janë pranuar ndërkombëtarisht, futbolli dhe basketbolli mbeten jashtë FIFA-s dhe respektivisht FIBA-s.