Britania do t’i ndalojë “terapitë shëruese” për homoseksualët

Trajtimet dhe praktikat e ndryshme, me të cilat pretendohet se mund të ndërrohet orientimi seksual i njerëzve, kanë qenë kundërthënëse për vite të tëra.

Kryeministri i Britanisë së Madhe, Boris Johnson, ka thënë se të ashtuquajturat ‘terapi shërimi’ për homoseksualët janë absolutisht të neveritshme dhe do të ndalohen me ligj.

“Unë mendoj se kjo është absolutisht e neveritshme dhe nuk ka vend në një shoqëri të civilizuar, nuk ka vend në këtë shtet. Ajo që do të bëjmë ne është një hulumtim nëse kjo është duke ndodhur, sa shpesh është e shfaqur dhe pastaj do t’i çojmë përpara planet për ta ndaluar atë”, tha shefi i Qeverisë britanike.

Ministrat britanikë kishin premtuar në vitin 2018 se do t’i bëjnë të paligjshme këto trajtime, por prej asaj kohe është shënuar pak përparim në këtë aspekt, shkruan “Daily Mail”, transmeton albinfo.ch.

Sipas një studimi qeveritar të vitit 2018, dy për qind e personave homoseksualë në Britaninë e Madhe u janë nënshtruar terapive, me të cilat pretendohet ndërrimi i orientimit seksual, ndërsa 5 për qind kanë pasur oferta për terapi të këtilla.