Britania shpërndan falas miliona teste të antitrupave të koronavirusit

Qeveria britanike po planifikon të shpërndajë miliona teste falas të antitrupave të koronavirusit, pasi një variant i tyre i mbështetur prej saj rezultoi i suksesshëm.

Reuters thonë se testet e krijuara nga Konsorciumi i Testimit të Shpejtë në Mbretërinë e Bashkuar (UK-RTC), në partneritet me Universitetin e Oksofordit dhe kompanitë kryesore që merren me diagnostikimin e virusit, janë të sakta në masën 98.6 për qind, përcjell albinfo.ch.

“Ky test i shpejtë po rezulton vërtet i mahnitshëm”, deklaroi John Bell, profesor i mjekësisë në Oksford dhe drejtuesi i programit të Qeverisë për testimin e antitrupave.

Testi i gjakut kryhet përmes një shpimi në gisht dhe brenda 20 minutash tregon nëse individi ka qenë i ekspozuar nga koronavirusi i ri.

Në Britani deri më tani ishin aprovuar vetëm teste serologjike, me të cilat kampionet e gjakut dërgoheshin në laboratorë për analiza që zgjasnin disa ditë. Dhjetëra mijëra prototipe të këtyre testeve ishin prodhuar në fabrikat anekënd Mbretërisë së Bashkuar që përpara se të mbërrinte aprovimi zyrtar, i cili duket, konsiderohej i pritshëm.

Ministrat britanikë shpresojnë që testi të jetë i gatshëm për përdorim masiv mbi të gjithë popullatën përpara fundit të vitit.

“Po i nxisim partnerët tanë që të prodhojnë qindra mijëra teste në muaj”, tha Chris Hand, lideri i konsorciumit të testimit që është përfshirë në këtë inciativë.

Sipas tij, janë në bisedime me departamentin vendas të shëndetësisë që të blejë brenda 2020-ës miliona teste të tilla, të cilat pritet të shpërndahen më pas falas.