Britania interesohet për investime në Kosovë

Bizneset kanë shprehur interesimin e tyre që të investojnë, posaçërisht në sektorët e minierave, energjisë dhe industrisë së ushqimit

Dhjetëra biznese dhe përfaqësues të institucioneve publike të Kosovës po qëndrojnë në Britaninë e Madhe me qëllim që të forcojnë bashkëpunimit dhe të promovojnë Kosovën si vend i përshtatshëm për investitorë britanik. Ky delegacion po udhëhiqet nga zëvendëskryeministrja Mimoza Kusari-Lila. 

Zëvendëskryeministrja kosovare është takuar me homologun britanik, Lord Stephen Green, me të cilin ka diskutuar për mundësitë e bashkëpunimit midis dy vendeve në ofrimin e përkrahjes, promovimit dhe informatave për bizneset që dëshirojnë të investojnë në Kosovë. 

Lord Green, siç thuhet në një kumtesë të MTI-së, ka premtuar përkrahjen dhe ndihmën e institucionit që ai drejton në promovimin e Kosovës si vend potencial për investime britanike. Ai gjithashtu ka ofruar edhe ndihmën e institucionit të tij në ngritjen e kapaciteteve të APIK. 

Në ditën e parë të vizitës delegacioni kosovar vizitoi qytetin Sheffield, i njohur si vendi i dytë më i zhvilluar ekonomikisht në Angli. Nën mikpritjen e Odës Ekonomike të Sheffield-it është diskutuar për mundësitë e bashkëpunimit midis bizneseve nga të dyja vendet. 

“Kosova ka qenë një vend i industrializuar dhe presim shumë shpejt të ri-industrializohet sërish. Në besojmë që përvoja e bizneseve në Sheffield, posaçërisht në fushën e energjisë, minierave dhe industrisë përpunuese mund të jetë shembull për zhvillimin e këtyre industrive në Kosovë”, ka thënë Kusari-Lila. 

Ndërsa ministri tjetër kosovar, ai Ekonomisë, Besim Beqaj prezantoi mundësitë investive në sektorin e energjisë dhe ndërmarrjeve publike, ndërsa Valdrin Lluka, kryeshef i Agjencisë për Promovim të Investimeve ka prezantuar projektet konkrete ku mund të investohet në Kosovë. 

Gjatë gjithë kohës bizneset nga Britania e Madhe, siç thuhet më tej në komunikatë, kanë shprehur interesimin e tyre dhe vullnetin e mirë që të investojnë dhe të rrisin bashkëpunimin me Kosovën. Ato posaçërisht ishin të interesuara për sektorët e minierave, energjisë dhe industrisë së përpunimit të ushqimit. 

Kjo vizitë është organizuar nga Agjencia për Promovim të Investimeve e Kosovës (APIK) në bashkëpunim me Odën Ekonomike Britanike dhe Ambasadën e Mbretërisë së Bashkuar në Kosovë.