Britania, në krizë politike

KEYSTONE

Nuk ka qetësi politike dhe ekonomike për Britaninë e Madhe, ku shtohen zërat se shumë shpejt qeveria Truss mund të bjerë.

Ministri i ri Financave, Jeremy Hunt, ka shpallur një sërë masash në përpjekje për të rivendosur besimin e tregjeve, të cilët u tronditën nga mini-buxheti i paraqitur nga paraardhësi i tij, i cili u shkarkua.

“Ne do të anulojmë pothuajse të gjitha masat tatimore të shpallura në planin e 3 javëve më parë. Së dyti, kam vendosur që norma bazë e tatimit mbi të ardhurat do të mbetet në masën 20% dhe do ta bëjë për një kohë të pacaktuar derisa situata ekonomike të lejojnë uljen e tij”, u shpreh ministri i Thesarit.

Njoftimi i Hunt duket se varros synimin e kryeministres Liz Truss për të rimëkëmbur ekonominë britanike duke ulur taksat.

Liz Truss e nisi planin e saj muajin e kaluar, duke thënë vazhdimisht se  do të ulte taksat sapo të vinte në detyrë, pavarësisht paralajmërimeve të përsëritura nga ekonomistët dhe madje edhe ish-ministrat konservatorë se një gjë e tillë do të ishte jashtëzakonisht e rrezikshme.

Pasojat dramatike kanë njollosur reputacionin e Britanisë në mbarë botën dhe kanë shkaktuar kritika nga udhëheqësit politikë dhe financiarë. Madje, plani i saj u kritikua edhe nga presidenti Biden./TheGuardian