Bullgaria dhe Rumania në Shengen, hiqen kontrollet kufitare ajrore dhe detare

@pixabay

Vendet anëtare të Bashkimit Evropian kanë arritur marrëveshje për heqjen e kontrolleve të kufirit të brendshëm ajror dhe detar me Bullgarinë dhe Rumaninë.

Ministri i Punëve të Brendshme të Spanjës, Fernando Grande-Marlaska Gomez, ka thënë se ishte shumë i kënaqur që në vitin 2024 kontrollet e brendshme ajrore dhe detare midis Bullgarisë dhe Rumanisë dhe vendeve të tjera të Shengenit do të bëheshin një gjë e së kaluarës pas 12 vjetësh negociatash.

Nga data 31 mars 2024 nuk do të ketë më kontrolle të personave në kufijtë e brendshëm ajrorë dhe detarë të BE-së midis Bullgarisë dhe Rumanisë dhe vendeve të tjera në zonën Shengen, teksa pas këtij hapi duhet të merret një vendim për caktimin e një date për heqjen e kontrolleve të kufirit të brendshëm tokësor, përcjell albinfo.ch.

Ndërkaq, që nga pranimi i Bullgarisë dhe Rumanisë në Bashkimin Evropian, vendet kanë zbatuar pjesë të kuadrit ligjor të Shengenit, duke përfshirë ato që lidhen me kontrollin e kufirit të jashtëm, bashkëpunimin policor dhe përdorimin e Sistemit të Informacionit Shengen.