Çifti zviceran, të cilit iu përmbys varka në Borsh, gjendet në Korfuz

Ministria e Mbrojtjes informoi fillimisht gjetjen e bashkëshortit Peter Kaser dhe më pas të gruas së tij, Vera Kaser. Ata ndodhen në spitalin e Korfuzit

Një çift zviceran që kishte lundruar pasditen e së premtes me një varkë të vogël në afërsi të fshatit Borsh në jug të Shqipërisë u raportuan si të humbur në orët e mbrëmjes.

Ndërsa, në mëngjesin e sotëm Ministria e Mbrojtjes informoi fillimisht gjetjen e bashkëshortit Peter Kaser dhe më pas të gruas së tij, Vera Kaser. Ata ndodhen në spitalin e Korfuzit dhe gjendja e tyre shëndetësore është tejet e rëndë. 62-vjeçari Peter Kaser ndodhet në gjendje të rëndë shëndetësore, ndërsa Vera ndodhet në gjendje shoku.

Anijet e forcave detare dhe një helikopter u angazhuan të marrin pjesë në operacionin e kërkim-shpëtimit të çiftit, njofton Ministria e Mbrojtjes.