Çollaku: Janë përmbushur kriteret për heqjen e vizave

Ministri i Integrimit Evropian, Bekim Çollaku i informoi ambasadorët e shteteve anëtare të BE-së, se Kosova i ka përmbushur edhe rekomandimet e fundit për heqjen e vizave

Pala kosovare pretendon se i ka përmbushur të gjitha kriteret e kërkuara nga Bashkimi Evropian për liberalizim të vizave, dhe tani pret dritën e gjelbër, për heqje vizash. Për këtë çështje, Ministri i Integrimit Evropian, Bekim Çollaku, ka takuar sot ambasadorët e shteteve anëtare të BE-së, për t’i njoftuar për zhvillimet e reja.

Takimi, sipas një njoftimi lëshuar nga Ministra e Integrimit Evropian, është zhvilluar me ftesë të Zyrës së BE-së në Kosovë.

“Gjatë këtij takimi ministri Çollaku, ka informuar ambasadorët, rreth përmbushjes së tetë rekomandimeve të fundit në procesin e liberalizimit të vizave dhe hapave të radhës që priten, në javët e ardhshme. Ndërsa ambasadorët e shteteve anëtare të BE-së, kanë vlerësuar përkushtimin e institucioneve kosovare përgjatë gjithë procesit duke konfirmuar mbështetjen e shteteve të tyre përkatëse në këtë drejtim”, thuhet në njoftim.

Ndryshe, fund të vitit të kaluar, Bashkimi Evropian konsideroi se Kosova nuk i ka përmbushur të gjitha rekomandimet e nevojshme për heqje të vizave. Nga 95 rekomandime sa janë paraqitur në Udhërrëfyesin për Liberalizim të Vizave, vetëm 8 pika duhet të plotësohen ende, transmeton albinfo.ch.
Këto pika janë: 1) Nënshkrimi i marrëveshjes për riatdhesim me Turqinë; 2) Vazhdimi i angazhimit në riintegrimin e qëndrueshëm të personave të riatdhesuar; 3). Forcimin e kritereve dhe procedurave për ndryshimin emrit personal;4). Rivendosjen e kontrollit të dyfisht kufitar në Pikën Kufitare të Morinës; 5). Rritjen e numrit të gjyqtarëve në Departamentin e Krimeve të Rënda në Gjykatën Themelore në Prishtinë; 6). Hetimi i rasteve të korrupsionit dhe krimit të organizuar. 7). Lidhjen operacionale dhe e Teknologjisë informative në mes të të gjithë institucioneve të përfshira në të gjithë zinxhirin e drejtësisë penale; 8). Të sigurohet funksionimi i Organit Shqyrtues të Prokurimit, duke emëruar anëtaret e rinj të bordit të OSHP-së, si dhe të miratohet Ligji për Prokurimin Publik.

Ministri i integrimit, Çollaku ka thënë se Kosova i ka përmbushur edhe këto pika dhe pret rekomandime pozove nga BE. Madje ai është shprehur i bindur se sivjet do të hiqen vizat për kosovarët.