Cooper në Prishtinë për presion

Ndërmjetësi i Bashkimit Evropian në bisedimet nëdërmjet Kosovës dhe Serbisë, Robert Cooper, do të qëndrojë sot në Kosovë. Ai thuhet se vjen për të sjellë propozimin evropian për zgjidhjen e çështjes së përfaqësimit të Kosovës në forumet rajonale.

Ardhjen në Kosovë të Cooperit e ka konfirmuar edhe Maja Kocijanqiq, zëdhënëse e shefes së diplomacisë evropiane, Kethrin Eshton.

Sipas mediave kosovare, pritet që Cooper të bëjë presion ndaj palës kosovare që të pranojë fusnotën dhe Rezolutën 1244, ndërsa si “lehtësim” për Kosovën përmendet të jetë edhe mendimi i GJND-së.

Kurse zëvendëskryeministrja Edita Tahiri ka thënë se e sigurt është se Prishtina s’e pranon praninë e Rezolutës 1244 në fusnotën e saj, e as heqjen e Republikës.

Përgjatë javëve të kaluara, Cooper kishte vazhduar kontaktet me delegacionin e Kosovës dhe atë të Serbisë për të gjetur një zgjidhje të pranueshme për të dyja palët rreth bashkëpunimit rajonal, përkatësisht rreth mënyrës së përfaqësimit të Kosovës në nismat dhe forumet rajonale.

Beogradi zyrtar vazhdon të insistojë që Kosova të përfaqësohet nën Rezolutën 1244 të Këshillit të Sigurimit, ndërsa autoritetet kosovare kanë këmbëngulur, deri më tani, në përfaqësimin si shtet i pavarur.