DASH: Shqipëria ka bërë progres të vogël kundër narkotikëve

Shqipëria figuron në raportin ndërkombëtar për kontrollin e narkotikëve, i cili u publikua nga Departamenti Amerikan i Shtetit

Raporti thekson se Shqipëria ka bërë progres të vogël në luftën kundër trafikut të lëndëve narkotike. Raporti shkruan se qeveria në Shqipëri nuk i kushton shumë rëndësi kësaj çështjeje, për shkak të problemeve të tjera më madhore. “Konfiskimet e drogës dhe ndjekjet penale vazhdojnë të mbeten në të njëjtat nivele si të një viti më parë.  Por përpjekjet për të luftuar trafikun e narkotikëve pengohen nga mungesa e burimeve, korrupsioni,  dhe vullneti politik. Shqipëria është një vend tranzit për në Evropën perëndimore. Grupet e krimit përfitojnë nga pozita gjeografike strategjike e Shqipërisë, kontrolli i kufijve dhe zbatimit në mënyrë jo të barabartë të ligjit”, thuhet  në raport, citonjnë mediat e Tiranës.

Më tej thuhet se në përjashtim të kanabisit, Shqipëria nuk është një prodhues i rëndësishëm i drogave të paligjshme, si dhe i sasive të mëdha të kimikateve apo drogave sintetike.  “Për shkak të çështjeve të tjera shumë të ngutshme, qeveria në Shqipëri nuk është në gjendje t’i kushtojë shumë kohë apo burime abuzimit me drogën. Nuk ka të dhëna për nivelin e përdorimit të drogës në Shqipëri, por disa të dhëna flasin për një përdorim në rritje, veçanërisht në mesin e të rinjve”, vijon raporti.

 “Ka disa prova që tregojnë se Shqipëria po bën një progres modest në fushën e narkotikëve. Zonat kryesore të përmirësimit janë operacionet antitrafik, zbatimi më i mirë i ligjit, kontrollet kufitare që çuan në rritje  të arrestimeve dhe sekuestrimeve në nëntë muajt e parë të 2011”, thuhet gjithashtu në raportin e DASH-it.