De Raho: Krimi shqiptar është shumë i pranishëm në Itali

Prokurori kombëtar i Antimafias dhe Antiterrorizëm, Federico Cafiero De Raho ka qëndruar në Tiranë, ku është pritur nga prokurorja e përgjithshme, Arta Marku dhe drejtues të tjerë të Qeverisë Shqiptare.

Prokurori italian konfirmoi atë që përflitej në raportin e inteligjencës italiane për grupet kriminale shqiptare përtej Adriatikut.

Duke folur për mediat në përfundim të takimit me kryeprokuroren Arta Marku, Federico Caliero De Raho tha se aktiviteti kriminal shqiptar është prezent dhe i shtrirë në gjithë territorin e Italisë, përcjell albinfo.ch.

“Krimi shqiptar është shumë i pranishëm në Itali dhe në aleancë me mafian italiane. Bashkëpunon me Ndraghetën, Sacra Corona Unita e grupe të tjera kriminale. Ka një shtrirje edhe në veri të vendit dhe së fundi drejton edhe trafikun e kokainës”, theksoi De Raho.

Sipas prokurorit italian, shqetësues është aktiviteti në trafikun e kokainës, por edhe përfshirja në trafikun e drogërave më të lehta dhe të armëve.