Kosova dekoron ish-komandantin gjerman Reinhardt

Presidenti i Kosovës, Hashim Thaçi dekoroi gjeneralin Reinhardt me Medaljen Ushtarake për Shërbim në Kosovë. ai u shpreh i emocionuar me zhvillimet në Kosovë

Ish-komandanti i KFOR-it në Kosovës, gjenerali gjerman Klaus Reinhardt është dekoruar sot nga presidenti i Kosovës, Hashim Thaçi, me Medaljen Ushtarake për Shërbim në Kosovë. kjo medalje u jepet personaliteteve që kanë dhënë kontribut të madh në çlirimin e Kosovës apo në ruajtjen e paqes gjatë shtetndërtimit.

Presidenti Thaçi ka thënë se gjenerali Reinhardt është njeriu i paqes, sigurisë dhe stabilitetit në Kosovën e pasluftës.

“Gjenerali Reinhardt është gjenerali i paqes, stabilitetit dhe fillimit të përbashkët të ndërtimit të institucioneve të reja në Kosovë”, ka thënë presidenti Thaçi.

Nga ana tjetër, ish-komandanti i KFOR-it, Klaus Reinhardt, është shprehur shumë krenar dhe i emocionuar me ndarjen e kësaj medalje për të, për të cilën ka thënë se asnjëherë nuk e ka pritur.

“Unë isha 17 vjet më parë këtu. Në atë kohë nuk kishte asgjë, asnjë shkollë, asnjë spital, kaos. Tash, pas 17 viteve, po i shoh ndryshimet rrënjësore. Jam shumë krenar që kam ndihmuar sadopak në këtë. Jam shumë krenar që kam punuar me juve. Keni bërë një punë shumë të madhe në promovimin e Kosovës”, ka thënë gjenerali Reinhardt.

Sipas tij, Kosova ka qenë krejt një tjetër vend dhe është dashur të riorganizohet.

“Kemi ndërtuar një qeveri në atë kohë me presidentin e sotshëm të Kosovës. Nëse sot shohim se ku qëndron shteti i juaj, është bërë një përparim shumë i madh përpara. Ju keni arritur që nga një pjesë e Serbisë të ndërtoni një shtet që funksionon. Ai funksionon, sepse keni një president, i cili bashkë me tjerët kanë punuar dhe asnjëherë nuk janë dorëzuar për t’i shtyrë gjerat përpara”, ka thënë gjenerali Reinhardt.

Presidenti Thaçi e ka falënderuar gjeneralin Reinhardt për angazhimin e tij maksimal dhe historik për paqen në vend, për ndërtimin e shoqërisë shumetnike dhe integrimin e të gjithëve në institucionet e vendit.