Deda jep dorëheqje nga Vetëvendosje

Ilir Deda, i cili kohën e fundit ka vepruar ndryshe nga krahu tjetër i Vetëvendosjes, sot e ka zyrtarizuar ndarjen, duke e quajtur LVV-në promotor të ndryshimeve në Kosovë

Anëtari më i ri i Lëvizjes Vetëvendosje, deputeti Ilir Dida ka dhënë sot dorëheqje nga kjo parti, për të vazhduar rrugëtimin e tij ndaras nga partia e Visar Ymerit. Deda, i cili kohën e fundit ka vepruar ndryshe nga krahu tjetër i Vetëvendosjes, sot e ka zyrtarizuar ndarjen, duke e quajtur Vetëvendosjen promotor të ndryshimeve në vend.

“Këto dy vjet e fundit ne kemi pasur një bashkëperiudhë të mirë. Por në nëntë muajt e fundit kemi pasur dallime në Vetëvendosje. Asgjë nuk kemi pasur personale. Kemi funksionuar të ndarë dhe sot po e zyrtarizoj ndarjen”, ka deklaruar Deda në një konferencë për media, ku ishte i pranishëm edhe sekretari i LVV-së, Dardan Molliqaj.

Ai tha se Vetëvendosje është katalizator i ndryshimeve, por në rrugëtim do të ketë njerëz të tjerë. “Tash nuk ka nevojë për spekulime unë jam nda nga Vetëvendosje që nga dita e sotme”, ka deklaruar Deda.

Ndërkaq sekretari organizativ i Vetëvendosjes, Dardan Molliqaj ka deklaruar se pas largimit të Ilir Dedës, për Vetëvendosjen ditët në vijim do të jenë të rënda, por prap do të konsolidohet dhe të forcohet edhe më shumë.

“Në betejën e opozitës së bashkuar kanë ndodhur shumë gjëra të mira, por edhe jo të mira. Ne kemi bërë maksimumin. Sot është një ditë jo e mirë për ne sepse po ndahemi nga Iliri. Kjo është periudha ku kemi pasur dallime. Partia jonë do të mbetet ende me qëllime të njëjta. Ne po zgjerohemi që të fuqizohemi”, ka deklaruar Molliqaj.

Ilir Deda para se të kalonte në Vetëvendosje, ai ka qenë pjesë e partisë “Fryma e re” një subjekt politik i formuar nga një grup të rinjësh që janë shkolluar kryesisht jashtë vendit: Shpend Ahmetin, Puhie Demakun, Qëndrim Gashin, etj. Pasi me këtë parti nuk patën sukses, disa nga ta i shkrinë në Vetëvendosje.