Delegacioni i Vetëvendosjes për vizitë në Zvicër

Në kuadër të kësaj vizite përveç takimeve me aktivistë e simpatizantë të Vetëvendosjes janë realizuar takime edhe me zyrtarë zviceranë

Një delegacion i Lëvizjes Vetëvendosje  qëndroi për 3 ditë në Zvicër.

Delegacioni i përbërë nga nënkryetarja, Aida Dërguti, drejtuesja e komitetit për marrëdhënie me jashtë e diasporë, Puhie Demaku, si dhe Ermira Danaj, anëtare e komitetit për çështje sociale, në kuadër të kësaj vizite përveç takimeve me aktivistë e simpatizantë të Vetëvendosjes  kanë realizuar takime edhe me zyrtarë zviceranë. 

Të dielën, në kopshtin e të zhdukurve në Gjenevë, delegacioni është  takuar me me Jenny Betanncourt, kryetare e shoqatës “Kopshti i të zhdukurve”  dhe  Pierre-Alain Tschudi, anëtar i kësaj shoqate, njëherësh dhe deputet në këshillin administrativ të Komunës së Meyrin.

Gjatë këtij takimi është bërë e ditur se është krijuar koalicioni i organizatave te ndryshme ndërkombëtare i quajtur “IKAED”. Në një njoftim të Vetëvendosjes thuhet se ky koalicion organizatash mund të shfrytëzohet si urë ndërlidhëse për përfshirjen e shoqatave të ndryshme shqiptare ku edhe Kosova mund të jap edhe kontributin e saj për nënshkrimin dhe ratifikimin e konventës për të zhdukurit. 

Pas kësaj, delegacioni është takuar edhe me gratë dhe vajzat shqiptare në Gjenevë, ku temë diskutimi ishin çështjet që i shqetësojnë gratë në diasporë.Të hënën, delegacioni ishte ftuar në një takim zyrtar në Parlamentin e Zvicrës nga Ueli Leuenberger, kryetar i Partisë së të Gjelbërve të Zvicrës, deputet nacional dhe kryetar i komisionit për emigracion në parlamentin e Zvicrës. Gjatë këtij takimi është diskutuar për zhvillimet aktuale në Kosovë, si dhe çështja e diasporës shqiptare në Zvicër dhe integrimi i saj.

Delegacioni i Vetëvendosjes ka ndjekur drejtpërsëdrejti një nga seancat e parlamentit zviceran.  Ndërkohë janë realizuar takime edhe me nënkryetaren e parlamentit, Maya Graf dhe drejtorin e Universitetit Popullor Shqiptar (UPSH), Manuel Tornare, i cili njëkohësisht është edhe këshilltar nacional i kantonit të Gjenevës dhe anëtar i komisionit për politikë të jashtme në parlamentin e Zvicrës, bëhet e ditur nëpërmjet një komunikate të lëshuar nga “Vetëvendosje”.