Dell: Organizimi i zgjedhjeve në Kosovë dëmton edhe Serbinë

"Ne nuk do të pranojmë rezultatin e zgjedhjeve të tilla. Por, unë mendoj se ne nuk do të vijmë në këtë situatë"

Ambasadori amerikan në Kosovë, Christopher Dell, ka paralajmëruar Serbinë që të mos provojë organizimin e zgjedhjeve serbe në Kosovë,　

Sipas tij, kjo do të ishte në kundërshtim me Rezolutën 12 44, por edhe do t’i shkaktonte dëm afatgjatë interesave të Serbisë.

“Nëse përpiqet të organizohen zgjedhjet, mendoj se fillimisht do të hedhim poshtë legalitetin e atyre zgjedhjeve. Ne nuk do të pranojmë rezultatin e zgjedhjeve të tilla. Por, unë mendoj se ne nuk do të vijmë në këtë situatë.

Autoritetet në Beograd duhet të kuptojnë se bashkësia ndërkombëtare është shumë serioze kur thotë se nëse lejohet të lëvizë përpara me zgjedhjet, kjo do të jetë i dëmshëm për interesat e Serbisë”, tha ambasadori Dell, në një intervistë për rrjetin e kanaleve televizive serbe në Kosovë, të cilën e citon “Vestionline”.

Duke komentuar protestën e Lëvizjes “Vetëvendosje”, lidhur me marrëveshjen e arritur për përfaqësimin e Kosovës në forumet rajonale, Dell, ka deklaruar se kjo lëvizje në shumë forma më tepër është në linjë me Serbinë, sesa me Kosovën.

Ai e ka vlerësuar se marrëveshja për përfaqësimin rajonal të Kosovës është e dobishme për dy shtetet, por me të cilën, sipas tij, Kosova ka fituar shumë.