Deputeti socialist në Shqipëri jep dorëheqje pasi familjarët e tij rrahën dy qytetarë

Ditë më parë, disa persona në Fushë-Krujë ushtruan dhunë fizike mbi dy qytetarë të Shqipërisë në një lokal. Policia e shtetit ndaloi katër prej tyre dhe shpalli në kërkim disa të tjerë.

Videot e kësaj dhune, ku shfaqin armët dhe shkopinjtë e drunjta të autorëve, mbushën rrjetet sociale dhe mediat e Shqipërisë dhe tregojnë qartë se në mesin e të dyshuarve është edhe djali i deputetit socialist, Rrahman Rraja, si dhe dy vëllezërit e tij, bashkë me të paktën 5 persona të tjerë, teksa godasin me sende të forta dy shtetas në një kafene, shkruan Zëri i Amerikës.

Gjatë së shtunës deputeti Rrahman Rraja ka dorëzuar mandatin e tij dhe u tërhoq nga jeta politike, përcjell albinfo.ch.

Rraja ka kërkuar falje publike dy viktimave dhe i ka bërë thirrje djalit të tij të arratisur t’i dorëzohet drejtësisë.

Ai tha se ndjehej i turpëruar nga veprimet e të birit, se kishte dështuar si prind, ndërkohë që banorët e krahinës e kishin zgjedhur kryetar komune më herët si dhe deputet të tyre në dy mandate, përcjell albinfo.ch.