Policia bashkiake e Cyrihut ka paraqitur ankesë ndaj deputetit të Partisë Popullore Zvicerane (UDC/SVP), Christoph Marty, pas deklaratave të publikuara në Facebook, të cilat lidhen me akuza për diskriminim dhe nxitje të urrejtjes.
Policia bashkiake e Cyrihut ka paraqitur ankesë pranë autoriteteve kompetente ndaj Christoph Martyt, anëtar i Parlamentit Kantonal të Cyrihut nga radhët e Partisë Popullore Zvicerane (UDC/SVP).
Rasti lidhet me disa deklarata të publikuara nga Marty në Facebook, në të cilat ai kritikonte policinë për mungesë efektiviteti, duke pretenduar se në radhët e saj dominojnë gratë dhe personat homoseksualë.
Sipas transmetuesit publik zviceran RTS, në Prokurorinë Publike janë paraqitur disa ankesa lidhur me këtë çështje. Autoritetet nuk kanë bërë të ditur numrin e tyre apo personat që i kanë paraqitur. Deri më tani, vetëm policia ka konfirmuar zyrtarisht se ka paraqitur ankesë ndaj deputetit.
E majta kërkon falje publike
Të hënën, përfaqësues të partive të majta kërkuan që Marty të kërkojë falje publike para Parlamentit Kantonal të Cyrihut.
Deputeti socialist Alan David Sangines deklaroi për emisionin radiofonik La Matinale se denigrimi i njerëzve për shkak të gjinisë ose orientimit seksual është i papranueshëm dhe bie ndesh me parimet e një debati serioz.
Ai shtoi se një sjellje e tillë nga një anëtar i parlamentit dëmton edhe reputacionin e të gjithë institucionit.
Marty refuzon të kërkojë falje
Drejtuesit e policisë i kishin kërkuar më herët Martyt të tërhiqte deklaratat e tij, por deputeti refuzoi të kërkonte falje. Megjithatë, ai e fshiu postimin nga Facebook-u.
Marty u mbrojt duke thënë se në këtë rrjet social publikon mendimet e tij në cilësinë e një qytetari dhe jo si deputet, përfaqësues i grupit parlamentar apo anëtar i partisë.
Ai pretendoi se profili i tij në Facebook nuk e identifikon si anëtar të Parlamentit Kantonal të Cyrihut dhe se deklaratat e tij lidhen me pakënaqësinë ndaj asaj që e cilësoi si zbatim selektiv të ligjit.
Deklaratat pas përleshjeve në Cyrih
Postimi i Martyt erdhi pas incidenteve të ndodhura në mesin e tetorit, gjatë shpërndarjes nga policia të një feste të paligjshme në zonën e Hardplatzit, në Cyrih.
Gjatë ndërhyrjes, policët u sulmuan me mjete piroteknike, gurë dhe shishe. Si pasojë, një zyrtar policor mbeti i lënduar, ndërsa disa automjete policore pësuan dëme të konsiderueshme.
Pas ngjarjes, Christoph Marty kritikoi policinë për faktin se, sipas tij, nuk ishte arrestuar asnjë nga personat e përfshirë në trazira.
Grupi parlamentar i UDC/SVP-së ka refuzuar të komentojë rastin.
