Dëshmitarët e mbrojtur të Gjykatës Speciale, jashtë vendit

Shumica e këtyre dëshmitarëve, siç thuhet në Kosovës, janë ish-luftëtarë të UÇK-së që do të deklarojnë kundër eprorëve të tyre në proceset e Gjykatës Speciale për krime të luftës

Shumë dëshmitarë të mbrojtur që pritet të jenë vendimtar në proceset gjyqësore kundër ish eprorëve të ish-Ushtrisë Çlirimtare të Kosovës, tashmë janë vendosur jashtë Kosovës, kryesisht në vendet e BE-së. Shumica nga ta, janë ish luftëtarë të UÇK-së që do të deklarojnë kundër eprorëve të tyre në proceset e Gjykatës Speciale.

Gjykata Speciale, e cila pritet të nis punën vitin e ardhshëm në Holandë dhe Prishtinë, do të trajtojë akuzat për krime lufte të cilat burojnë nga Raporti i senatorit zviceran Dick Marty. Gjykata, pritet të funksionalizohet pas një marrëveshjeje ndërmjet Kosovës. Holandës dhe BE-së.

Sipas burimeve të Express, dëshmitarët kanë njohuri për krimet e luftës që kanë ndodhur gjatë vitit 1999-2000 në Kosovë. Po ashtu bëhet e ditur se tashmë komandantët janë në dijeni për dëshmitarët të cilët pritet të dëshmojnë me identitet të mbrojtur për krimet e luftës.

Përfaqësuesit ndërkombëtarë kanë paralajmëruar se aktakuzat e para kundër ish-eprorëve të UÇK-së pritet të ngritën në fillim të viti të ardhshëm, menjëherë pas fillimit të punës të Gjykatës Speciale. Nga aspekti ligjor Gjykata e ka infrastrukturën e gatshme, ndërsa kërkohet vetëm logjistika.